Mdee, Waitara wapanda kizimbani

 

Wabunge, Halima Mdee wa Jimbo la Kawe (wa tatu kushoto) na Mwita Waitara wa Jimbo la Ukonga (wa nne kushoto) wakiwa katika Mahakama ya Hakimu Mkazi Kisutu, Dar es Salaam jana kusomewa mashitaka ya kumjeruhi Katibu Tawala Mkoa wa Dar es Salaam, Theresia Mmbando wakati wa uchaguzi wa Meya wa Jiji hivi karibuni. (Na Mpigapicha Wetu).

 WABUNGE wawili, Halima Mdee (Kawe) na Mbunge wa Ukonga, Mwita Waitara na wanachama wengine wa Chadema wamepandishwa kizimbani wakikabiliwa na mashitaka ya kumjeruhi Katibu Tawala wa Mkoa wa Dar es Salaam, Theresa Mmbando.

Wengine waliopandishwa ni Diwani wa kata ya Saranga, Kinondoni, Ephraimu Kinyafu pamoja na mwanachama wa Chadema, Rafii Juma.

Watu hao walipandishwa kizimbani katika Mahakama ya Hakimu Mkazi Kisutu na kusomewa mashitaka mbele ya Hakimu Mkazi Mkuu, Huruma Shaidi. Mwenyekiti wa wabunge na madiwani wa Ukawa, Manas Mjema ambaye pia anakabiliwa na mashitaka hayo hakufika mahakamani hapo.

Washitakiwa walifikishwa mahakamani jana mchana wakiwa chini ya ulinzi wa Jeshi la Polisi, wakitoka Kituo Kikuu Kanda ya Dar es Salaam.

Akiwasomea mashitaka, Wakili wa Serikali, Mwaanamina Kombakono alidai kuwa Februari 27, mwaka huu katika Viwanja vya Karimjee Dar es Salaam, kwa pamoja washtakiwa walimjeruhi Mmbando na kumsababishia majeraha mbalimbali kwenye mwili wake.

Washitakiwa walikana mashitaka, na upande wa Jamhuri ulidai upelelezi wa shauri hilo haujakamilika, hivyo wanaomba tarehe nyingine ya kutajwa. Pia waliiomba mahakama itoe hati ya mwito wa kuitwa Mjema kutokana na kitendo chake cha kutofika mahakamani.

Chanzo Habari Leo.